ΙΟΥΝΙΟΣ ΙΘ
ΑΣΥΓΚΡΙΤΟΣ ΙΕΡΟΜΑΡΤΥΣ
ΚΑΝΩΝ
ΕΙΣ ΤΟΝ ΟΡΘΡΟΝ
Ὁ Κανών. Ποίημα Ἰωάννου.
ᾨδὴ α’. Ἦχος γ΄. Τῷ ῥυσαμένῳ τὸν Ἰσραὴλ ἐκ δουλείας.
Ἐν θεοπνεύστοις ᾄσμασι πάντες, οἱ πιστοὶ δοξάσωμεν μεγαλοφώνως, Ἀσύγκριτον τὸν γενναῖον Ἀθλητήν, καὶ στρατιώτην Χριστοῦ τοῦ Βασιλέως.
Θωρακισάμενος τὴν πανοπλίαν ἐνθέως, τοῦ Ἁγίου Πνεύματος γενναῖε Μάρτυς, κατέβαλες τὸν ἀντίπαλον ἐχθρόν, ἐν τῷ σταδίῳ νομίμως ἐναθλήσας.
Θεοτοκίον.
Τὴν Μητέρα Σου Χριστὲ Θεοτόκον, οἱ πιστοὶ δοξάζομεν ἀκαταπαύστως, ὡς πρεσβεύουσαν ὑπὲρ πάντων ἡμῶν, τοῦ λυτρωθῆναι ἡμᾶς ἐκ τῶν κινδύνων.
ᾨδὴ γ΄. Ἐστερεώθη ἡ καρδία μου ἐν Κυρίῳ.
Στερεωθεὶς ὁ Μάρτυς τῇ θείᾳ πίστει, τοῦ Σωτῆρος πάσας τὰς τῶν τυράννων, μηχανὰς ἀπεκρούσατο τῇ ἀνδρείᾳ αὐτοῦ.
Τῇ ἀκλινεῖ σου πίστει τοὺς παρανόμους, ἐχθροὺς τῆς πίστεως ἐτροπώσω, καὶ τῶν πιστῶν πεφανέρωσαι Μάρτυς στερέωμα.
Θεοτοκίον.
Ἡ τὸν Θεὸν ἐν μήτρᾳ Σου δεξαμένη, καὶ τεκοῦσα τοῦτον σεσαρκωμένον, Θεοτόκε ἱκέτευε τοῦ σωθῆναι ἡμᾶς.
ᾨδὴ δ΄. Ἀκήκοα Κύριε.
Ἐνδυσάμενος ἔνδοξε, τὴν πανοπλίαν τῆς εὐσεβείας, τὰ τῆς πλάνης τόξα ἤμβλυνας, τῷ τῆς πίστεως θυρεῷ Μάρτυς Ἀσύγκριτε.
Σὺ τῷ ὄμβρῳ τῆς πίστεως, καθάπερ φοῖνιξ βλαστήσας Μάρτυς, τῷ πυρὶ τῆς σῆς ἀθλήσεως, ἀπεξήρανας ἐμφανῶς τῆς πλάνης ἀκάνθας.
Θεοτοκίον.
Τὸ μυστήριον ἄχραντε, τῆς ὑπὲρ λόγον κυήσεώς Σου, τὰ οὐράνια κατέπληξε, καὶ ἐφώτισε μυστικῶς τὰ ἐπίγεια.
ᾨδὴ ε’. Τὴν Σὴν εἰρήνην δὸς ἡμῖν Υἱὲ τοῦ Θεοῦ.
Ἐν τῷ φωτὶ τῶν ἄθλων σου Μάρτυς Ἀσύγκριτε, διασκεδάζεις τὴν πλάνην τῶν ἐχθρῶν ἐμφανῶς, ἐν τῇ Ἐκκλησίᾳ, τὰς ἀκτῖνας τῆς καρδίας καταλάμπων ἀεί.
Θεῷ θυσίαν ἄμωμον Μάρτυς προσήγαγες, σεαυτὸν δι’ ἀθλήσεως Ἀσύγκριτε, καὶ τῆς ἀσεβείας, τὰς θυσίας ἐστηλίτευσας μακάριε.
Θεοτοκίον.
Οἱ ἐξ ἐθνῶν ὑμνοῦμέν Σε Θεοτόκε ἁγνή, ὅτι Χριστὸν τὸν Θεὸν ἡμῶν ἔτεκες, τὸν ἐκ τῆς κατάρας, τῆς ἀρχαίας διὰ Σοῦ ἐλευθερώσαντα.
ᾨδὴ στ΄. Ἐβόησα, ἐν στεναγμοῖς ἀσιγήτοις.
Ἡ μνήμη σου, ἡ ὑπέρλαμπρος Μάρτυς, τὰς διανοίας τῶν πιστῶν, κατεφαίδρυνε σαφῶς, ἀνυμνεῖν εὐσεβῶς, τὰ ἀγωνίσματα καὶ τὴν ἀνδραγαθίαν.
Ἐνίκησας, τὸν ἀρχέκακον ὄφιν, ἐν τῷ σταδίῳ Ἀθλητά, καὶ τὸ στέφος κατ’ αὐτοῦ, ἐκ Θεοῦ ἐκομίσω, τὸ ἀμαράντινον ὡραιότατε Μάρτυς.
Θεοτοκίον.
Θεός ἐστιν, ὁ τεχθεὶς ἐκ Παρθένου, εἰς ἀναγέννησιν ἡμῶν, καὶ ἐφώτισεν ἡμᾶς, εἰς ἐπίγνωσιν Αὐτοῦ, καὶ δοξάζομεν τὴν Αὐτοῦ εὐσπλαγχνίαν.
Συναξάριον
Τῇ ΙΘ΄ τοῦ αὐτοῦ Μηνός, μνήμη τοῦ Ἁγίου Ἱερομάρτυρος Ἀσυγκρίτου.
Ταῖς αὐτοῦ ἁγίαις πρεσβείαις, Χριστὲ ὁ Θεός, ἐλέησον ἡμᾶς. Ἀμήν.
ᾨδὴ ζ΄. Τὴν ἐν καμίνῳ φλόγα.
Μὴ προσκυνήσας εἰκόνα, τῆς πλάνης Ἀθλοφόρε, ἐν τῇ φλογὶ τῶν βασάνων, Χριστὸν ἐδοξολόγεις.
Ἐν τοῖς τῶν ἄθλων ἀγῶσι, κατήσχυνας ἀνδρείως, τὴν τῶν τυράννων μανίαν, Ἀσύγκριτε θεόφρον.
Θεοτοκίον.
Τὴν μετὰ τόκον παρθένον, ἀῤῥήτως φυλαχθεῖσαν, ὡς τοῦ Κυρίου Μητέρα, ὑμνήσωμεν ἀπαύστως.
ᾨδὴ η΄. Τὸν ἐν φλογί.
Ἀναλαβών, προθυμίαν ὁ Μάρτυς, δι’ Ἀγγέλου Θεοῦ, ἀκλινῶς τὸν ἀγῶνα, τῇ πίστει τετέλεκε, τῆς ἀθλήσεως τὸ φῶς, τῆς δικαιοσύνης, εἰληφὼς τοὺς στεφάνους.
Διαδραμών, παμμακάριστε Μάρτυς, χώρας καὶ πόλεις, ὑπὸ τῶν παρανόμων, αἰκισμοὺς ὑπέμεινας, εὐχαρίστῳ καρδίᾳ, καὶ τοὺς ἀχαρίστους, ἐνέπλησας αἰσχύνης.
Θεοτοκίον.
Χαῖρε σεμνή, δυσανάβατον ὕψος, τῶν βροτῶν ὀφθαλμοῖς· χαῖρε ὄμμασι νόων, βάθος δυσθεώρητον· χαῖρε Μήτηρ Παρθένε, καὶ Θεοκυῆτορ, εὐλογημένη Μαρία.
ᾨδὴ θ΄. Σὲ τὴν ἀθάνατον πηγήν.
Συνὼν ἐν ὕψει τῆς πίστεως Χριστῷ, τὴν ὑψαύχενον ἔπαρσιν, τῶν τυράννων καθεῖλες ἀθλήσει σου, τοῦ Ὑψίστου γενόμενος, στρατιώτης γενναιότατος.
Περιελθὼν καθὼς Παῦλος ὁ σοφός, Ἀθλοφόρε Ἀσύγκριτε, τοῦ ἐχθροῦ τῶν παγίδων περίσωζε, ἀεὶ τοὺς προστρέχοντας, σῇ σκέπῃ παμμακάριστε.
Θεοτοκίον.
Σὲ τὴν ἐκ ῥίζης Ἰεσσαί, καὶ Δαυΐδ τοῦ Προπάτορος, ἐκβλαστήσασαν ῥάβδον πανάχραντε, οἱ πιστοὶ μεγαλύνομεν, ὅτι σώζεις τὰς ψυχὰς ἡμῶν.
Δεν υπάρχουν σχόλια:
Δημοσίευση σχολίου